பட்ஸ் வைத்து காது குடையலாமா...

 பட்ஸ் வைத்து காது குடையலாமா... மருத்துவம் சொல்வது என்ன? 

பட்ஸ் வைத்து காது குடைந்தால் என்ன ஆகும் தெரியுமா?

சளி, இருமல், காதுவலி, தொண்டை கரகரப்பு... எனக் காது, மூக்கு, தொண்டை தொடர்பான பிரச்னைகள் நாம் அனைவரும் எதிர்கொள்பவைதாம். ஆனால், அந்தப் பிரச்னைகள் ஏன் வருகின்றன, எப்படியெல்லாம் பாதிப்புகளை ஏற்படுத்துகின்றன என்பது பற்றி ஆயிரம் கேள்விகளும் சந்தேகங்களும் நமக்கு இருக்கும். இது போன்ற சந்தேகங்களைத் தீர்ப்பதற்காகவே, ஒரு விழிப்புஉணர்வு கருத்தரங்கு சென்னை ராஜீவ் காந்தி அரசு பொது மருத்துவமனையில் இன்று நடைபெற்றது.

பட்ஸ் வைத்து காது குடையலாமா விளக்கு மருத்துவர் முத்துகுமார்

காது தொடர்பாக நாம் எதிர்கொள்ளும் பொதுவான பிரச்னைகள் குறித்து காது, மூக்கு, தொண்டை துறை இயக்குநரும், தலைவருமான முத்துக்குமார் பேசினார்... 

"ஊக்கு, ஹேர்- பின், தீக்குச்சி, பென்சில், பட்ஸ், பைக் சாவி என எது கையில் கிடைத்தாலும், அதை காதுக்குள்விட்டுக் குடையும் பழக்கம் நிறைய பேரிடம் இருக்கிறது. காதில் அழுக்கை நீக்குவதுதான் சுகாதாரம் என்று நினைப்பதும், காது குடைவதால் சுகமாக இருப்பதும்தான் இதற்குக் காரணங்கள். இரண்டுமே ஆபத்தான பழக்கங்கள். இந்தப் பழக்கத்தை ஒரு வழக்கமாகவே மாற்றிவைத்திருப்பார்கள் சிலர். 

காதுக்குள்ளிருக்கும் செருமினோஸ் சுரப்பிகள்தாம் (Ceruminous Glands) காது குரும்பியைச் சுரந்து, செவிப்பறையைப் பாதுகாக்கின்றன. காதுகள் சரியாகக் கேட்க வேண்டுமென்றால், செவிப்பறை பாதுகாப்பாக இருக்க வேண்டும். கண்களுக்கு இமைகளைப்போல, காதுகளுக்கு இயற்கை தந்திருக்கும் பாதுகாப்பு வளையம்தான் காதுக் குரும்பி. காதுக்குள் நுழையும் தூசி, அழுக்குகள் போன்ற அந்நியப் பொருள்கள் செவிப்பறையைப் பாதிக்காதபடி தடுப்பது இந்தக் குரும்பிதான். இவை தானாகவே காய்ந்து வெளியேறிவிடும். அகற்றத் தேவையில்லை.

மாறாக, ஏதாவது கூர்மையான பொருளை வைத்துக் காதைக் குடைவதால், காதிலிருந்து அழுக்கு வெளியேறுவதற்கு பதிலாக அதிகமாக உள்ளேதான் செல்கிறது. அப்போது செவிப்பறை பாதிக்கப்படும். தவறுதலாகச் செவிப்பறையில் அந்தப் பொருள்பட்டு கிழித்துவிட்டால், காதுவலி, காதில் புண், காது கேட்காமல் போவது, காதினுள் வீக்கம் ஏற்பட்டு வாயை அசைக்க முடியாமல் போகும் ஆபத்துகளும் ஏற்பட வாய்ப்புகளிருக்கின்றன. அதோடு புண்களால் தொற்றுகள் ஏற்படவும் இது வழிவகுக்கும். மேலும், இயற்கையாக அழுக்கை வெளியேற்றும் திறனைக் காது இழந்துவிடும். அப்போது மீண்டும் மீண்டும் அழுக்கு சேருவதைத் தடுக்க முடியாது. மேலும் பருத்தியாலான பட்ஸின் பஞ்சுகள் காதுக்குள் அலர்ஜியையும் ஏற்படுத்தும். இதனால்தான் பட்ஸ் வைத்து காது குடைவதை முற்றிலும் தவிர்க்கச் சொல்கிறோம். காதைச் சுத்தம் செய்யவே தேவையில்லை என்பது ஒருபுறமிருக்க, பட்ஸால் சுத்தம் செய்வது கூடவே கூடாது என்பதையும் வலியுறுத்திவருகிறோம். பட்ஸ் பயன்பாட்டைத் தடுக்க, கடைகளில் அதை விற்பதைத் தடைசெய்வதுகூட நல்லது.

காது அரிப்பு, காதில் அழுக்கு சேருவது, குரும்பி சேர்வது, சீழ் பிடிப்பது, காது அடைத்துக்கொள்வது போன்ற பிரச்னைகள் இருந்தால் மருத்துவரின் பரிந்துரையின் பேரில் இதற்கென உள்ள காது சொட்டு மருந்துகளைப் பயன்படுத்தலாம். 

காதுக்குள் எறும்பு, பூச்சி புகுந்திருந்தால் தேங்காய் எண்ணெய் சில துளிகள் விடலாம். இதனால் பூச்சி இறந்துவிடும். பின்னர் சிறிதளவு தண்ணீர்விட்டு தலையைச் சாய்த்தால், பூச்சி வெளியில் வந்துவிடும் அல்லது மருத்துவரிடம் காட்டி, அதற்கென உரிய கருவியால் வெளியில் எடுப்பதும் நல்லது. மாறாக, காய்ச்சிய எண்ணெயைக் காதுக்குள் ஊற்றக் கூடாது. 

காதில் சீழ் வடிதல்...

காதில் சீழ் வடிதலுக்கு முக்கியக் காரணம் தொற்று பாதிப்புதான். நீண்ட நாள்கள் கவனிக்கப்படாத ஜலதோஷப் பிரச்னையால், சளியிலிருக்கும் கிருமிகள் மூக்கின் பின்பக்கத்தில் இருக்கும் `ஈஸ்டாக்கியன் குழல்' (Eustachian tube) வழியாக நடுக்காதுக்குச் சென்று சீழ் வைக்கும். பிறகு அங்கிருந்து வெளிக்காது வழியாகச் சீழ் வெளியேறும். காதில் சீழ் வடிந்தால், கண்டிப்பாக அது கேட்கும்திறனைப் பாதிக்கும். மேலும், சீழ் காதுவழியாக மூளைக்குச் செல்லக்கூடிய வாய்ப்பும் இருக்கிறது. அதனால் சுயநினைவு இழப்பு ஏற்பட்டு, உயிரிழக்கவும் நேரிடலாம். எனவே, ஆரம்பநிலையிலேயே மருத்துவரிடம் சென்றால், மாத்திரை மருந்துகளிலேயே குணப்படுத்திவிட முடியும். சுய மருத்துவம் செய்துகொண்டு நாள்களைத் தள்ளிப்போட்டால், அறுவைசிகிச்சை செய்யவேண்டிய நிலை ஏற்படலாம்.